| Die vrouwe loech ende sprac echt Seker heer dat es recht [3505] Dat ghi die soene anegaet Ouermids uwer vriende raet Die dat orloghe souden draghen Met v woudijt emmer waghen Nu hebben si te hant [3510] Om maghe ende om vriende ghesant Ende hebben hem vertrocken voert Also ghi vore hebt ghehoert Ende vragheden den goeden lieden Wat si hem hier toe rieden [3515] ¶Die vriende te samen ghinghen Ende aensaghen alle die dinghen Ende tracteerden langhe van desen Welc dat beste mochte wesen Sulken dochte goet wesen die raet [3520] Ende sulken dochti harde quaet Doch concordeerden si int leste Dat die pays waer beste Ende rieden zere daer toe ¶Prudentia sprac doe [3525] Ic hebbe altoes horen segghen Men soude weldaet niet verlegghen Noch versten alst waer tijt Men soudt doen sonder respijt Daer bi cortet dat radic v [3530] Dat ghi na soudt doen dat doet nv Dus heeft men alte hant Wise boden henen ghesant Die den vianden seyden Dat si quamen sonder beyden [3535] Haer here waer also beuaen Dat hise soude gherne ontfaen Te sire vrienscap dat ware waer Ende hadde sine vriende ontboden daer Ende dat si al daer ter stede [3540] Haer borghen souden bringhen mede Si dancten den bode sere Ende spraken segt onsen here Her mellibeus dat hi Hem niet en belghe want wi [3545] Selen schiere comen te hem wert Ende al doen dat hi begheert ¶Doen sprac een van hen lieden Laet ons onse vriende ontbieden So dat wi comen daer [3550] Eerlijc met groter scare Doen sprac een die daer stoet |
|
Dat dien raet niet en waer goet Want des volx menechfuldechede Hadde dicke te menegher stede [3555] Groten orbore belet Sine wouden niemanne met Dan haer borghen in die vaert Aldus trocken si derwaert ¶Doen si int huys quamen ghegaen [3560] Es mellibeus op ghestaen Ende sprac ghi heren wilt mi verstaen Ghi hebt mi grote scande ghedaen Daer ghi ane met rechte groet Wel verdient hebt die doet [3565] Waer bi ic weten wille van v Of ghi des te mi wert nv Bliuen wilt onghelet Ende in vrouwe prudentien met Si antworden ende seyden doe [3570] Here wi sijn te quaet daer toe Dat wi in v huys comen souden So groet sijn onse scouden Ende dat wi hier comen nv Dat es op ghenade van v [3575] Beyde van goede ende van liue Willen wi tuwert bliuen Mettien vielen si ter erden Op haer knien te sire werden Ende weenden harde zere [3580] Doen dat sach die here Nam hise op lieflijc te hant Ende hiefse op daer hise vant Ende heeftse te sinen wille ontfaen Ende hietse weder thuys wert gaen [3585] Ende dat si ouer viij. daghe te samen Aldus weder voer hem quamen Dus scieden si van daer doe Ende waren blide ende vroe
Hoe prudentia haren man
toe sprac [...].Lv.
HIerenbinnen so quam [3590] Vrouwe prudentia ende nam Mellibeus heymelike Ende vraghede hem subtilike Wat penitentien hi woude Dat elc van hem doen soude [3595] Hi seyde vrouwe des sijt vroet Ic wille hem nemen al haer goet |
