| Maer waer hem mesdaet leet [3410] Ende dat beteren wouden ghereet Dat sijs coenlike bleuen dan In mellibeus haren man Si soudene wel hebben in dien Dat hem niet en soude messchien [3415] Doen waren si so blide Dat si ten seluen tide Van bliscapen weenden doe ¶Dus spraken si der vrouwen toe Wise vrouwe ende goede [3420] Bouen allen vrouwe vroede Gheloeft sidi dat ghi dit segt Ende ons dit te voren legt Wine hadden v niet dorren porren Noch hier af bidden dorren [3425] Hier heeft ons dwaeshey t toe brocht Daer bi souden wi ghesocht Talder yrst hebben oetmoet Alse wi oec hadden des sijt vroet Maer wine wisten niet met allen [3430] Dat ons hadde moghen vallen Vrouwe nv willen wi vroech ende spade Altoes werken bi uwen rade Ende van allen lude ende stille Bliuen in mijns heren wille [3435] Ghelijc dat ghi hebt gheseyt Wi bidden v vrouwe op goedertirenhey t Oetmoedelijc dat ghi dus doet Nochtan duchten wi des sijt vroet Om dat onse mestdaet es so groet [3440] Dat hi ons in groter noet Ende scanden setten mach want hi Sonderinghe gram op ons si Daer bi lieue vrouwe Bidden wi v helpt ons hier toe [3445] Dat ghi ons also bewerft Dat wi niet en bliuen bederft ¶Prudentia sprac dats waer Hets ieghen redene ende alte swaer Ieghen recht ende ieghen wet [3450] Ende onbehoerlijc daer toe met Dat enech mensche soeken soude Ane sinen viant troest ende houde Om in sinen wille te staen Van dat hi hem hadde mesdaen [3455] Maer al sidi sere mesdadech Mijn here sal v sijn ghenadech Daer en twifelt v niet an |
|
Hi es so goedertieren een man Ende so milde daer toe meer [3460] Hine gheert el niet dan eere Hets waer salomon heeft bescreuen Nieman en sal macht gheuen Bouen hem seluen wijf no kinde Noch anderen mensche hoe zeer hine minde [3465] So eest wel te wetene dan Dat sinen viant gheen man Bouen hem seluen sal gheuen macht Wie dat doet es qualijc bedacht Maer hier om en lates niet [3470] Ghine doet dat ic v riet Ic salne hebben wel in dien V en salre niet af messchien ¶Die drie viande spraken nv Vrouwe wi ghetroesten ons tot v [3475] Ende in uwe goedertierenhede Ende in mellibeus mede Ende uwer beyder wille Willen wi doen lude ende stille Ende so wanneer ghijt ghebiedt [3480] Doet ons halen ende en lates niet Wi willen sijn ghereet Te doene al v beheet
Hoe prudentia die soene maecte
[...]Liiij
DEse drie trocken achter waert Prudentia ghinc metter vaert [3485] Te haren man ende heeft hem vertrocken Al dat si hadden ghesproken Also ghelijc alse ghi Nu hebt horen segghen mi Ende heeft hem ghevraghet [3490] Hoe dat hem behaghet ¶Alse mellibeus heeft vernomen Dat si te berouwe sijn comen Ende haer mesdaet ghien Sprac hi te hant mettien [3495] So wie dat hem sculdech gheeft Van dat hi mesdaen heeft Ende ghenade dan begheert Es ghenaden dan wel weert Daer bi vrouwe dat verstaet [3500] Důnct mi goet wesen v raet Eest dat ons onse vriende raden Ende ons willen ghestaden |
