| Ende menech ander god weet Die zeer om tgheloue street Ende die heylighen sonder getal [3220] Die om tgheloue storuen al ¶Stichten salmen oec gheuecht Om der heyligher kerken recht Want si onse heylighe moeder es Ende wi haer kindere sijts ghewes [3225] Het es een quaet kint dat verstaet Dat sijnre moeder niet bi en staet In node ende in verdriet Ende die bederuen liet ¶Voer die gherechtichey t also [3230] Salmen oec striden daer toe Ihesus sydrac seghet al bloet Ghi soudt vechten toter doet Om die gherechtichede Te settene in haer stede [3235] God sal met v plechten Ende selue v viande aenvechten ¶Om pays ende om vrede Salmen oec vechten mede Ende striden metter hant [3240] Tullius doet ons becant Waer enech man so beraden Dat hi lant liede of staden In discorde maken woude Datmen dien met rechte soude [3245] Met stride eer ter doet bringhen Eer hi volbrochte sine dinghen ¶Die mensche sal oec vechten mede Om te behoudene sine vrijhede Ende om dienst te wederstaen [3250] Die hem niet te rechte en hoert ane Daer om salmen striden ter doet Tullius seghet ons al bloet Hi seget als noet comt ende tijt Dan salmen hebben strijt [3255] Ende die doet dan sonder letten Voer onsculdeghen dienste setten Ende voer alle dinghen mede Daer in laghe lelijchede ¶Seneca horen wi ghewaghen [3260] Hets beter werden verslaghen Dan in eyghendom sijn gesetIeghen recht ende ieghen wet Eneghe quade dinghen bestaen Die leliker dorperheyt aengaen [3265] Maer es yeman eyghen knecht |
|
Metter waerheyt ende na recht Dies en sal hi rueken twint Paulus doet ons bekint In sine epistele alsict vinde [3270] Die hi dien thorienten sinde Elc late hem ghenoeghen des Daer hi in gheroepen es Eest dat ghi dienst knecht sijt Sijt verduldech talre tijt [3275] ¶Men sal oec vechten dat verstaet Om te werene cracht ende ouerdaet Want loye ende decretale Ende alle rechte wet dat wale Roepen ghemeynlijc ouer al [3280] Datmen cracht met crachten weren sal ¶Men sal oec vechten starc ende stijf Om te bescuddene dat lijf Ende striden oec metter hant Also die rechten doen becant [3285] Daer men aldus vint bescreuen Als die man bescudt sijn leuen Wat hi doet in dien gheuechte Dat schijnt wel ghedaen te rechte Naturlijc recht orloeft dat [3290] Dat hem die mensche telker stat Bescudden sal vander doet Noch seghet recht al bloet Dat hem die mensche bescudden mach Te voren eer comt die slach [3295] Hets beter in tijts wederstaen Dan namaels ter wraken ghegaen Maer dat sal met bescede wesen Na dat noet es van desen Men sal oec met groten ghere [3300] Vechten om die lants were Metten here alst es tijt Ja als hi ghebiedt den strijt Salmen met hem vechten ghereyt Also ons cathone seyt [3305] ¶Ic scede wt in desen doene Liede van religione Die der wapene niet en horen toe Want tote hem spreect god also Gheeft mi op die wrake [3310] Ic sal lonen die sake Ende eest oec dat v yeman sleet Aen v wanghe biedt dander ghereet Beroeft men v van enen clede Soe biedt dander daer toe mede |
