Nv hebt horen segghen mi Van rijcheden ende van armoede Ende van breken van ertschen goede Sone wilt v dan verheffen niet [3040] Op uwe rijcheyt wats ghesciet Want quistise in orloghen Seker ghi sult daer om doghen Ende altoes becommert bliuen Ende ghetelt metten keytiuen [3045] Want een man sonder goet Moet altoes bliuen onder voet
Van arghen die comen van orlo-
ghen
Gheen rijchey t en es groet genoech Toten orloghe int gheuoech Want en es nieman in ertrike [3050] Van ghelde no van goede so rike Ten moete al verteert werden Wilt hi dorloghe langhe herden Ende so die man sijts ghewes Mechtigher ende riker es [3055] So sijn cost meerder sijn moet Want wilt hi sparen sijn goet So sal dorloghe sonder wanc Hebben cleynen voertganc Es hi te mate sone can hi niet [3060] Dorloghe ghehouden wats gesciet Es hi rijc so es hi echt Te meerderen cost dats sijn recht Eest dat dorloghe langhe duert So eest dan zere gheauontuert [3065] Hine verliest sine rijcheyde Of dorloghe of licht beyde Of licht sijn lijf daer toe So heeft hi scande ende scade also Ende so hi meerder es van namen [3070] So men hem spreect meer blamen Ende oec voerder loept die mare Marciael spreect openbaer So hogher staet die man So hi swaerliker vallet dan
Van striden te scuwene ende or
loghen [...]li
[3075] ORloghe sal elc man Altoes scuwen waer hi can |
|
Want wt orloghen also Comen meest die stride toe Stride die sijn altoes quaet [3080] Ende wet datse god haet Daer om sprac die coninc dauid Hen allen die begheren strijt Die verderft ende doet steruen Eer dat si v liede bederuen [3085] Mi dunct na dat ic sie Dat een mechtich man die Gherne vecht ende strijt Ende hem des niet en vermijdt Dat hi onnutte es waerlike [3090] Voer gode ende op ertrike Want hi maghe ende ghebure Haer leuen maect te suere Met vechtene ende met brande Ende met vernoye menegherande [3095] Sonder scout te menegher stonde God spreect selue met sinen monde Salech sijn die vredelike Want haer es hemelrike ¶Dander redene nv aensiet [3100] Stride die en deren niet Den vianden allene Maer den volc al ghemene Dat arm wert ende verbrant Ende moeten rumen haer lant [3105] ¶Die derde redene es dese In vechtene leghet grote vrese Daer om staet daer gescreuen dat Wel salech es die stat Die haer twistelike dinghen [3110] In rasten setten met dadinghen ¶Die vierde redene es van dien Daer om men strijt sal ontsien Dats om die misselijcheyt Die ane den strijt gheleyt [3115] Want ane des volx willicheyt Noch met redeliker wijsheyt Sone mach nieman kinnen Wie den strijt sal verwinnen Daer om sprac aldus [3120] Iudas macubeus Die victorie niet en leyt In des volx willecheyt Maer uter cracht dat verstaet Die uten hemel bouen gaet [3125] Hets gode een cleyn dinc des sijt vroet |
