Folio 17v

  Index | << Previous page | Next page >>  
PRudentia antworde daer na Want ghi in rijcheden alsic versta V seluen alte zere verlaet Ende sonderlinghe armoede haet [2945] So willic v van desen .ij. dan Een luttel spreken so ic best can Ghi sult rijcheyt scuwen altoes Die v mach maken eereloes Want rijcheyt qualike beiaghet [2950] Maect den mensche onbehaghet Met gode ende metten menschen met Ende diese onneerlike beset Es onwert in elke stede Ende oec scuwet armoede mede [2955] Die in bringhet noet ende breke Nu verstaet wel wat ic spreke Hets waer ghelt can waerlike Doen regneren in ertrike En sijn princen noch ander heren [2960] Die langhe mochten regneren Sonder ertsche rijcheyt Ende al dit ertsche beleyt Eest van dien ofte van desen Moet mids ertsche rijchey t wesen [2965] Princen ende ander heren Smeken vleyen ende eren Den riken wel gheghelden man Die borghen lenen ende gheuen can En es port wiket no dore [2970] Men latene liden daer dore Ende heeft sinen orbore sciere gedaen Daer dandere moeten buten staen Ende also den riken voer waer Ere ende vordeel volghet naer [2975] Also volghet den armen mede Smade ende verduldechede Alse hi sijn goet heeft verloren Als ghi namaels moghet horen

Van noetdorfticheyden. [...]xlix


BOuen al es noetdorfticheyt [2980] Moeder van alder archeyt Want si den scamelen can keren Wt sijnre eersamer eren Noet den scamelen daer toe stoect Dat hi hulpe ende raet soect [2985] Ane sinen viant sijts ghewes Dat een dat swaerste dinc es
 
 Dat die scamele hebben mach Als ons cassidorus doet ghewach Daer bi so wanneer dat verstaet [2990] Dat die mensche hulpe ontfaet Ende troest van sinen viant Gheeft hi hem verwonnen te hant Dat es alte swaer nochtan Den eersamen scamelen man [2995] Seneca maect ons vroet Dat noet den mensche lieghen doet Ende dat si oec can impetreren Vanden mensche al haer begheren Cassidorus scrijft oec van dien [3000] Dat wi behoeflijchey t selen vlien Want si dicke met haren rade Den mensche stoect ten quade Salomon seghet .iiij. dinghen Sijn die dat volc dwinghen [3005] Hongher droefheyt ende strijt Dat vierde es des seker sijt Dat die liede merken ende verstaen Welc goet of quaet es ghedaen Salomon scrijft noch van desen [3010] Hets beter steruen dan arm wesen Maer wet dat hi niet arm en leeft So wie dat sine noetdorft heeft Rijcheyt es in haer seluen goet Ende die gheeft god des sijt vroet [3015] Den goeden mensche om dat hise Bekeren sal in goeder wise Beyde in dogheden ende in eren Ende sonderlinghe ten loue ons heren Ende die quade dat ghijt wet [3020] Vaert daer ter hellen met Want sine ghiereghe herte fel En laetse hem niet bekeren wel Want hi wilt daer recht met breken Ende oude veeden wreken [3025] Ende wesen bouen sine gheburen goet Ende die oec werpen onder voet Ende wijf ende kindere met Sijn daer alle bi ontset Een philosophe maect ons gewes [3030] Dat ghelt een verdoemenes es Salomon bat in sijn leuen Here en wilt mi niet gheuen Te vele armoeds noch rijcheden Maer houdt mi in middelheden [3035] Here mellibeus na dat ghi