Folio 17r

  Index | << Previous page | Next page >>  

Van twisen . [...]xlv


[2855] Elc mensche wildijs getrouwen Sal twist ende discort scuwen Hebdijt ieghen v ouerhoet Die v te mechtich es ende te groet So moghedi wel weten te voren [2860] Dat ghi die sake hebt verloren Hebdijt ieghen v ghelike So staet die dinc twifelike Hebdijt oec ieghen die ghene Die mate sijn ende clene [2865] Soe eest v scande sidi vroet Daer om en es niet so goet Als datmen in rusten sal leuen Ende gode die wrake op gheuen So bleefdi seker onghehoent [2870] Want hi alle dinc te rechte loent Een maet man die niet en can Wederstaen den mechteghen man Sal wijsselijc daer na gomen Hoe hi te sire vrienscap sal comen [2875] Des en hebt ghene scame Want ten es ghene blame Den ghenen wiken sijts gewes Die den anderen te mechtich es Want als hem die mate man stoert [2880] Opten mechteghen wert hi verdoert Ende gaet verwoedt nacht ende dach Om dat hijt beteren niet en mach Daer om eest bat sine vrome Dat hi te sire vrienscap come [2885] Ende leue in goeden ghenoeghe Dan of hi hem seluen versloeghe

Van verduldecheden. [...]xlvj


VErduldechey t dats een doghet Die den mensche zere verhoghet Want wat si siet of hoert [2890] Sine wert daer om niet gestoert Onrecht plaghe ende mesfal Can si verdraghen ouer al Sonder ontsetten van sinne Dits een poent van groten gewinne [2895] Verduldechey t voer waer gheseyt Es een verborghen rijcheyt Want si den mensche sekerlike In sijn herte maket rike
 
 Beyde van rasten ende van vreden [2900] Oec so wintmen daer mede Hemelrijc dat es waer Haer en es niet te swaer Si lidet lichtelijc al Eest verlies eest ongheual [2905] Verdrachlijchey t can tallen daghen Die wrekers uten lande iaghen Ende si blijft sittende vast In haer ghemac ende in haer rast Ende si maect salich elken man [2910] In wien dat si wonen can ΒΆDie sinen tijt wille leyden In rusten ende in salicheyden Op ertrike in sinen daghen Die moet leren verdraghen [2915] Ende god na dit corte leuen Sal hem hemelrike gheuen Also hi selue spreect daer In die ewangelie claer

Mellibeus antworde [...].xlvij.


MEllibeus sprac ende seyde [2920] Alsulke verduldecheyde Die te male vermaect si En hebbic niet in mi Al woudict al laten varen Mijn herte nochtan twaren [2925] Soude nacht ende dach sijn tonghemake Ende altoes peynsen om die wrake Ende so soudic in bedroeftheyden Seker al minen tijt so leyden Mi es beter ende noch also goet [2930] Dat ic vercoele minen moet Daer bi willic mi gheninden Ende cortelijc die quale inden Al hebben mine viande Meer maghe inden lande [2935] Ic ben riker dan si sijn Ic sal metten scatte mijn So vele volx verweruen Dat icse al sal bederuen Want hets een ghemeen spreken [2940] Dat die meneghe de borghe breken

Van rijcheyden ende van
Armoeden [...].xlviij.