| Sitten te bat met ghemake ¶Prudentia antworde daer naer [2670] Dat ghi segt dat es waer Maer dat en behoert also Nieman dan den rechter toe Die selen pinen die quadien Ende van hare quaethey t castien [2675] Na bescedenheyt sijts gewes Dat tfayt groet ende swaer es Om dat die quade die dat sien Hem te meer selen ontsien Want hi ducht nacht ende dach [2680] Dat hi in sulc ordele vallen mach Die rechter diet wel besiet Ende draget sweert sonder sake niet Maer ter wraken vroech ende spade Ouer die mesdadeghe quade [2685] Ende oec alse een troest der goeder Ende alse een ghemene behoeder Goede rechter houdt dat in dien Salmen meer minnen dan ontsien Men ontsiet den goeden prince niet [2690] Maer den quaden men ontsiet Om sine quaethey t die hi doet Dies maect ons paulus vroet Om dat die goede doghet mint Sone wilt hi mesdoen twint [2695] Ende die quade en darre mesdoen niet Om dat hi dat torment ontsiet Daer om derre ic toenlijc spreken Dat die rechter scarpelijc wreken Selen altoes die quaetheden [2700] Aen lijf aen goet ende aen leden Ende en sal des ghedoghen niet Datmen sijn recht versmaedt yet Die selue wreect des sijt vroet Dat hi den gerechte onrecht doet [2705] Want die wraken groet ende clene Horen toe den rechte allene Noch v niet noch anderen man Dien tgherechte niet gaet an Daer bi here biddic v [2710] Dat ghi te rechte gaet nv Ende laet hem plegen der wraken Na die groethey t vander saken So moeten si bederft bliuen Ende gherekent metten keytiuen [2715] So suldi wel uwen wille sien |
|
Ende wel gewroken sijn van dien Sonder uwen cost ende scadeDit es dnauste van minen rade
Mellibeus antworde ende vander
auonturen [...]xliij
MEllibeus sprac wats ghesciet [2720] Sulke wrake en willic niet Al dade hem die rechter blame Of haue of goet van hem name Sine soudens niet achten sere Ende ic souds hebben onnere [2725] Dat ic den rechter bidden soude Dat hi mi hier af wreken woude Sone haddic des sijt vroet Niet vele ghecoelt minen moet Daer bi willic selue so wreken [2730] Men sal daer ewelijc af spreken Ic beueelt der auonturen Die mi heeft in menegher vren Gheluc ghegheuen ende zeghe Beyde in velde ende in weghe [2735] Die mi niet en sal af gaen Si heeft mi dicke bi ghestaen ¶Prudentia sprac wats ghesciet Der auonturen en gheloeft niet So waerdi harde sot behaghel [2740] Dauonture es een broesch naghel Die nemen en can noch gheuen Noch noyt en hadde leuen Dit segghic v bi vele saken Die seneca cont can maken [2745] ¶Seneca seghet sonder helen Die hem der auonturen beuelen Sijn onbewaert sijts ghewes Want dauonture niet en es Noch seyt seneca alsict las [2750] Dat die auonture es een glas Dat scone blict ende claer Ende cort leghet ontwee daer Oec seghet een meester wijs Dauonture es als een ijs [2755] Dat starc schijnt ende nochtan Breket onder den man Ende verdrinct eer hijt weet Dits emmer een cranc beheet Also een sot medicijn [2760] Metter quader consten sijn Die liede dodet te menegher vren |
