| Die warenesse daer men met Een huys of een stat beset Die sijn in vele manieren Alsic v nv sal visieren [2485] Dat beste besetten als ic scouwe Dat sijn goede liede ghetrouwe Ende sonderlinghe wet wel dat Int besetten van eenre stat Want daer toe hoert menech man [2490] Ende gaet oec hem allen an Daer om so vermoghen sijt Alder best in alre tijt Ende het es misselijc of ghi Dit vinden soudt gheloues mi [2495] Want ghi hebt v liede dicke verwracht Ende op haer vrienscap luttel gheacht Doen ghi haers niet en bedorft sere Daer om sal elc lants here Sijns volx weygher sijn in dien [2500] So mislijc eest wat mach ghescien Want onwillighe liede doghen Den here luttel in orloghen Der stede rijcheyt es sonder getal Daer bi prisic bouen al [2505] Der poerter eendrachtichey t Bouen alle warisone geseyt Ende waer porteren discorderen Daer gaen si buten hare eren Also mellibeus boec seghet [2510] Daer grote wijsheyt in leget Een stat eendrachtich Es seker onwinachtich ¶Andere warisone sijn met Daer men slote mede beset [2515] Als vesten muren ende diken Oec bedarf men des gheliken Springalen ghescutten ende bogen Ende andere wapene die moghen Den lichame bescermen daer [2520] Daer die ziele in sculet voer waer Want als men comt ter weren En machmen des niet ontberen Maer wijs es hi die so leeft Dat hi des niet te doen en heeft [2525] Doude wise rieden v met Also ghi wel horet ende wet Datmen in desen orbore niet Haesten en soude wats ghesciet Maer datmen met goeden staden |
|
[2530] Daer op soude wel beraden Ende oec alle dinc bereyden Met groter voersienecheyden Tullius doet ons verstaen ¶In allen orboren sonder waen [2535] Die de mensche wilt aengaen So sal hi voer dat bestaen Gherescap doen te maken Eer hi beghint die saken Want mids onvoersienecheyt [2540] Valt die mensche in menech leyt Ende sonderlinghe des seker sijt Ieghen orloghe ende strijt So eest wel grote noet Dat die ghereescap si groet [2545] Ende die dat voersien connen Hebben den strijt half verwonnen Als men staden tracteert Dinc dat den stride toe hoert Ende wijslijc dat ordineert [2550] So es die dinc wel disponeert Sone derf nieman seggen niet Dat mids onrade yet messciet
Die sake waer om dat god
gaf mellibeus die onraste
[...]xlj.
DIe sake waer bi v god gaf Dese grote onraste daer af [2555] En mochten wi weten niet Die rechte waerhey t wats ghesciet Niet meer dan wi kinnen Eens anders herte binnen Also paulus ende propheten met [2560] In haer boeken hebben gheset Also en mach van gods werken Nieman claer die waerhey t merken En si bi moedene na gherake En ghesciede niet sonder sake [2565] In alle dese werelt wijt Ende oec des wel seker sijt Dat ic wel houde in dien Dat dit god liete gheschien Dat het es biden saken al [2570] Die ic v nv vertrecken sal Ghine hebt niet ontsien gode Noch ghehouden sine ghebode Ende oec uwen euenkersten |
