So wat goet sal duncken v Want mesdoen es menschelijc Maer daer in bliuen es duuelijc ¶Prudentia antworde saen [2210] Vwen raet en sal niet voert gaen Al hebdine gheconsenteert Hine es niet ghecorrigeert Men sal wijselijc tierst voersien Wat daer af mach gheschien [2215] Ende dan aengaen int leste Eendrachtelijc dat beste Ende dat meest orberlijc es Als ons dat loy maect gewes
Van rade te exmineren weder
hi orberlijc si of niet .xxxvj.
NV laet ons dan examineren [2220] Te wat orbore dat mach keren Den raet dien ghi hebt ghenomen Ende te wat inde dat hi mach comen Na dat wijt moghen versinnen Laet ons yrst aent hoeft beghinnen [2225] Der meester raet van surgien Selen wi der waerheyt lyen Dien was gherecht ende goet Want te haren ambacht des sijt vroet Behoert wel dat si nieman en haten [2230] Maer dat si allen lieden baten Leent hen oec mildelijc Van uwen goede ghi sijt rijc So dat si met willen claer Tuwer dochter nemen waer [2235] So dat si mach in corter stont Mids gods hulpe werden gesont Ende volget nv den rade mijn Al eest dat si v vriende sijn Nochtan suldi hem doen goet [2240] Hets dicke geseyt ende noch doet Dat medicine in haren sin Voer vrienscap setten haer ghewin Ende also van visikers met Ende van philosophen dat wet [2245] Die gherne nemen dat ghewin Want haer nature heuet in Die v alle alleens rieden Al volghedi dwasen lieden Nv willic van v weten saen [2250] Hoe ghi dat woert hebt verstaen |
|
Dat v die dwase spraken toe In wat manieren ende hoe Men contrarie na haer spreken Met contrarien soude breken [2255] ¶Mellibeus antworde saen Aldus hebbict verstaen Dat ic donrecht dat si mi daden Te haren scanden ende scaden Wreken soude ende in desen [2260] Dunct mi so waer ic ghenesen ¶Prudentia antworde dan Lichtelijc gheloeft die man Der dinc daer sijn sin toe staet Here mellibeus dat verstaet [2265] Dat woert en versta ic niet also Maer ic segghe aldus daer toe Dat quade wats ghesciet En es des quaets contrarie niet Noch onrecht des onrechts wet [2270] Noch contrarie der contrarien met Want dese sijn ghelijc Ende meerderen daghelijc Dese en minderen niet een bast Maer elc in hem seluen wast [2275] Maer aldus hebbict in moede Quaet es contrarie van goede Orloghe van payse mede Discoert ende eendrachtichede Daer toe hitte ende coude [2280] Deser exemplen men v soude Tonen sonder enech ghetal Maer wetti hoe ment verstaen sal Men moet verdriuen dat quaet Al met dogheden dat verstaet [2285] Met payse dat orloghe voert Ende met acorde dat discoert Dit sijn contrarien also men vint Daer men contrarie mede verwint Daer bi spreect sinte paulus [2290] Toten romainen aldus Ghine sult in ghenen sinnen Den quaden v laten verwinnen Maer ghi sult alsic v rade Met dogheden verwinnen die quade [2295] ¶Paulus seghet noch mede Altoes soect pays ende vrede Ende en loent vroech no spade Niemanne quaet met quade Maer met allen lieden sijt |
