Folio 13r

  Index | << Previous page | Next page >>  
Van allen gheloeften dat wet Daer sonde in laghe ofte blame [2120] Wert dat ten werken quame

Mellibeus antworde doe .xxxiij


Doen mellibeus hadde verstaen Der vrouwen worde antworde hi saen Vrouwe want ghi v bekint Dat ic mi zere hebbe versuumt [2125] In minen raet so biddic v Dat ghi mi wilt leren nv In wat manieren dat ic mi versuumt hebbe so moghen wi Ons een anderwerf hoeden [2130] Ende te bat ons beuroeden

Van dolinghen in Rade .xxxiiij.


HEre mellibeus nv verstaet Dat ghi dolet in uwen raet Doen ghi ontboedt wet wale So vele lieden tenenmale [2135] Om dat si v raet souden gheuen Men vint voer waer bescreuen Daer vele liede sijn dat daer Confuse es ende dat es waer Ende daer confuse es sonder wanc [2140] Daer es goet raet dicwile cranc Anderwerf doledi wet Ghi soudt v beraden met Vwen besten vrienden ende maghen Die tidech waren van daghen [2145] Die v raet hadden connen gheuen Nu hebdi uwen raet bedreuen Met ionghen sotten riesen Die v de wrake in bliesen Die volghen ende smeken connen [2150] Daer si donnosele mede honen Die en soudi metten worden niet Hebben doen comen wats gesciet Derdewerf doledi daer in Dat ghi ontdecket uwen sin [2155] Ende uwen willen vander saken Alse ghi woudt ter wraken Doen dat die ionghe hoerden Volgheden si uwen woerden Ende aensaghen vele meer [2160] Vwen wille dan v eere
 
 Vierdewerf waerdi oec verdrayt Dat ghi v so hilt ghepayt Met enen rade allene Daer so vele liede int ghemene [2165] Tenen hope vergadert waren Daer die sake so groet es twaren Daer behoeft men raeds vele Alsoet behoeft te sulken spele Vijftewerf doledi dat verstaet [2170] Dat ghi niet en proeuet uwen raet Weder hi quaet waer ofte goet Eer ghire toe settet uwen moet Sestewerf doledi mede Want dat es der wiser sede [2175] Alse haer rade discorderen Dat si dan wijslijc gronderen Welc men best ane gaet Ende volghen den wisen raet Ende meer aensien die nuttelijchey t [2180] Dan alder menschen vleescheyt Want van hondert menschen omtrent Men cume enen vroeden vint Want die sotte sijts ghewes En minnen niet dan dat sot es [2185] Die wise man ghewaerlike Vint selden sijns ghelike Daer om in ghedeelden rade Salmen volghen vroech ende spade Den raet die de vroetste gheuen [2190] Sone machmen niet lichte sneuen Daer af es dicwile gheschiet In goeden steden groet verdriet Dat si twisten inden rade Ende der wiser raet versmaden

Die antworde van mellibeus
∞ .xxxv.


[2195] MEllibeus sprac onverholen Ic bekenne een deel mijn dolen Maer ghi seghet so mi dochte Datmen raet wel wandelen mochte Na dat examineren [2200] Nochtan wert met meerder eren Datmen den raet so voersaghe Datter gheen wandel in en laghe Naden raet ende na tghelof Maer hoe dat si daer of [2205] Ic wille doen al gader nv