SI die v ten orloghe rieden [2030] Dat was al van ionghen lieden Die niet rijp en hebben den sin Daer en es niet dan kijnscheyt in Ende si minnen spade ende vroe Datter kijnscheyt horet toe [2035] Sine hebben oec niet gheproeft Watmen in die noet behoeft ¶Salomon seyt ende maect ghewes Wee den lande daer een kint coninc es Ende wies princen vroech eten [2040] Marcus doet ons oec weten Datmen der iongher raet en sal Niet betrouwen ouer al
Mellibeus antworde prudentien
.xxxj.
Vrouwe ic hebbe v nv ghehoert Spreken harde menech woert [2045] Maer also vallen v sproken En worde nemmermeer ghewroken Onrecht dan waer niet goet Sine present oec niet die waren vroet Men eest oec niet ghewone [2050] Maer ghi proeft die dinc so scone Met loyen ende met decreten Met philosophen ende met poeten Dat ics niet ghebreken en can Nu leert mi dan hoe enech man [2055] Sine gheloefte ende sinen raet Breken mach hoe dat gaet Want den goeden man toe hoert Dat hi wel houde sine woert Anders verlore hi goets mans name [2060] Ende bleue ewelijc in die blame
Wanneer men gheloeften ende
Raet breken sal ende mach
xxxij
HEre hier vore seydic v dat Nu willict v verclaren bat Al hebdi genomen raet Daer om en suldi dat verstaet [2065] Met dien rade niet voert gaen Ghine hebt yrstwerf wel verstaen Of die raet si orberlijc Men mach oec waerlijc |
|
Gheloeften breken sulken stont [2070] Om vele saken si v cont Deen es wanneer men v breect Gheloeften die men v toe spreect So moghedi duwe weder breken Wet dat die loye spreken [2075]Als oec nuwe saken comen Daer af men niet en hadde vernomen Eer men die gheloefte dede Dat machmen verwandelen mede Want te dien dinghen spade ende vroe [2080] Die van nuwes comen toe Daer hoert toe wel nuwen raet Na dat der saken toe gaet Worde uwen raet oec sulken stont Ghemaect uwen vianden cont [2085] Dien mochti oec muteren Dit es senecas leren ¶Haddi oec in eneghen daghen In rade ouer een ghedraghen Ende ghi namaels wordet gheware [2090] Dat dien raet niet goet en ware Sondelijc of ieghen recht Ghi mochtene wandelen echt Of ieghen tghebot ons heren Ghi mochtene wandelen met eren [2095] ¶Van gheloeften wilt oec verstaen Haddi gheloefte yemanne gedaen Dat lelijc waer ende quaet Waert dat volquame die daet Of dies ghi en hadt gheen macht [2100] Die gheloefte en heeft gheen cracht Haddi oec ghedaen sulc belof Daer ghi meer mocht ghedeert sijn of Dant hem mochte in staden staen Dien ghi tgheloefte hadt gedaen [2105] Dat mochti oec muteren Also ons die rechte leren Want dat meeste orbore men sal Meest voert setten ouer al Die vroede en lieget niet int leste [2110] Sonder loghene dat eest beste Ende hebdi gheloeft in enegher tijt Dinc dies ghi niet mechtich en sijt Ende dat ghedaen met eden So suldi gaen ghereden [2115] Vwen priester te biechtene saen Ende des penitentie ontfaen Ende des ghelijc oec met |
