Want salomon seyt die wise man Dat die droncken niet helen en can
Van te scuwene des gheens
raet die heymelijc seghet dat
een Ende dat ander openbaer
xxvij
Ghine sult nemen groet clene [1955] Raet die hier segghen een Ende ghinder een ander bringet voert Als men cassidorus segghen hoert Want die heymelike spreect Ende ghinder een ander ontdect [1960] Hem en salmen ghelouen twint Want men onghewarich kint
Van te scuwene des quaets
menschen raet [...] xxviij
Des quaets menschen raet wats ghesciet En sal men emmer volghen niet [1965] Want die quade dat verstaet En gaf hem seluen noyt goeden raet Want wt quaden gronde sijts gewes En mach niet comen dat goet es
Hoe men voersien sal of die
raet orberlijc es die ghe-
gheuen es Ende hoe men dien volghen sal [...] .xxix.
Nv hebbic v ghetelt [1970] Aen wien ghi raet soeken selt Nv suldi mi voert verstaen Alse ghi raet hebt ontfaen So suldi wijsselijc versinnen Hoe ghi die dinc sult beghinnen [1975] Middelen ende inden mede Dan sal v bescedenhede Voersienlike merken Hoe men daer in sal werken Ane dinsetten vander sake [1980] Seker so leghet grote rake Ende groet voerdeel elken man Diet te poente gheraken canWant setment onwijslijc in Daer volghes orbers na te min |
|
[1985] Voersiet oec wel ende verstaet Hem die v gaf den raet Ofte hi van partyen si Voersiet oec wel daer bi Of ghi wel macht hebben sult [1990] Der dinc die ghi beghinnen wilt Ghi sult oec wel merken echt Of uwe dinghen sijn gherecht Want datmen met onrecht beghint Wert met scanden dicke gheint [1995] ¶Seneca doet ons weten Het es beter stille gheseten Dan scade of scande begaen Noch doet hi ons verstaen Datmen lichte macht wederstaen [2000] Die scande eer si wert ghedaen Dan mense mach sonder waen Verdriuen alsi es ghedaen Maer bouen al met trouwen Suldi die doghet aenscouwen [2005] Want si can voer alle saken Den mensche wel met gode maken Want hi met sinen monde seyt Ic ben wech leuen ende waerhey t Daer om es des sijt vroet [2010] Bouen al die waerheyt goet Ecclesiastes maect ons ghewes Dat die dief meer te minnen es Dan een daghelijx loghenaer Onse heer spreect openbaer [2015] Dat die diuuel al te gader Loghenaer es ende sijn vader Daer bi suldi in uwen rade Wel voersien vroech ende spade V macht ende v redelijcheyt [2020] Ende wat orbore datter in leyt Een orloghe es begonnen saen Maer sie wel hoet mach vergaen ¶Mellibeus also ghi nv mi Hebt horen tellen daer bi [2025] So salmen voer wel versinnen Hoe men een orloghe sal beghinnen Hets saen ghedaen mi des betrouwet Dat namaels harde langhe rouwet
Van te scuwene der jongher
Raet [...] .xxx.
|
