Haer vrienscap wats ghesciet [1870] En willic te minen gheselle niet Watmen v toent ofte seyt Emmer gaet ter waerheyt So suldi v dinghen daer met sconen So en mach v nieman honen [1875] Al eest dat ghi wijshey t in v siet Nochtan gheloeft v seluen niet Maer soect ane den wisen raet Cassidorus spreect dat verstaet So die man wijsheden heeft meer [1880] So hi raet soeket eer Gherne werken bi rade En bringet in scande no scade
Van te scuwene der gheenre
raet die viant waren ende
versoent sijn
.xxiiij.
Ghi sult den raet scuwen twaren Der gheenre die v viant waren [1885] Een wijs man maect ons vroet Dat nieman seker soene en doet Met vianden hoe ment toent Daer men eens ieghen versoent Ysopus raedt oec met trouwen [1890] Datmen nieman en sal betruwen Noch ontdecken heymelijchede Daer men viantscap heeft mede Want der hatyen smerte Beroert altoes haer herte [1895] Also vier en es sonder roec Die wise seneca seget oec Hets beter spreect die meester goet Voer den vrient te bliuene doet Of te dolene in een vremt lant [1900] Dan te leuene biden viant Ouden viant seghet ons die heer En ghelouet nemmermeer Al neghe hi v telker stat Des en gheloeft hem niet te bat [1905] Peynst altoes nacht ende dach Dat hi v bedrieghen mach Petrus alphoncius doet ons becant Ghine sult met uwen viant Niet versellen daer ghijt versint [1910] Op dat ghi ander gheselscap vint Mesdoedi dat sal hi merken Eest in worden of in werken |
|
Ende dat harde onlanghe decken Ende achter v dat in arghe vertrecken [1915] Ende doedi doghet of enech goet Dat sal hi decken onder voet Die liede salmen scuwen Ende in gheenre doghet betruwen
Van te scuwene der gheenre
raet die meer schinen vriende
van vreesen dan van minnen
.xxv.
Ghi sult den raet scuwen van desen [1920] Die niet van minnen maer van vresen Minne toenen ende vrienscap Die minne es seker slap En sijn gheen vriende claer Maer viande dat es waer [1925] ¶Tullius seget die wise man Die vele wijsheden segghen can Dat die ghene wel es bewaert Die vele vriende heeft in die vaert Ende dat hi in ellenden leeft [1930] Die ghene vriende en heeft Die hatie van vele lieden En machmen niet met mieden Noch met beden oec breken Also men tullius hoert spreken [1935] Daer bi sijt seker van dien Dat ghi van hen die v ontsien Ghenen goeden vrient noch raet Ghewinnen en sult dat verstaet Want nieman en es vrient goet [1940] Des gheens dien hi ontsien moet Die in een stat of in een poert Hem seluen so setten voert Daer bi sijt seker van dien Dat hem alle die liede ontsien [1945] ¶Seneca maect ons ghewes Die van vele lieden ontsien es Moet vele lieden ontsien weder Want hine heeft vriende op noch neder
Datmen scuwen sal des dronc
kens menschen raet
xxvj
Ghi sult oec scuwen altoes [1950] Den raet des dronckens menschen dat verstaet |
