Waect en heeft ghenen vrede Ende waer dat vrede niet en es [1600] Daer en es god niet sijts gewes
Van haesticheden te scuwene in rade
.xix.
Haestichey t vroech ende spade Salmen scuwen inden rade Want haestichey t in vele dingen Can niet luttel archs in bringen [1605] Men vint heden enen raet Lichte men vintene morgen quaet Men vint enen beteren dan Men seyt hets een wijs man Die saen een dinc verstaen heeft [1610] Ende traechelijc sijn vonnes geeft Den raet die men langhe tracteert Werden gherne int beste ghekeert Men heeft dicke gheseget voer nv Na haesteghen raet goet berou [1615] Daer om en suldi hoet gaet Haestelijc gheuen no nemen raet Maer met goeder gestadecheyt Also ons seneca seyt Selen wi met voersienecheden [1620] Alle onse dinc beleyden So machmen segghen hoet gaet Dese heeft ghewracht sonder raet Hadde hi goets raets geplien Dat en hadde niet moghen gescien [1625] Goeden raet heeft altoes eere Ende vroemt oec harde zere Ende mere in rade can Maken den wisen man Maer lanc raet des sijt vroet [1630] En dochte noyt sotten goet Want die sot doet sonder beyden Alle dinc met haesticheyden Ende en peynst groet no smal Wat daer na volghen sal
Van heymelijcheden niet te
segghene en si om noet of
om orbore
.xx.
[1635] Uwe heymelijchey t suldi Nu houden besloten vrij Ende daer af nieman vragen raet |
|
In wat poente dat v staet Ghine moghes ghebetert wesen [1640] Jhesus sydrac spreect van desen Vrienden noch vianden uwen sin En suldi ontdecken meer no min Ende eest dat ghi daer met sijt beulect Dat ghijt yemant dan ontdect [1645] Want alse hijt hadde ghehoert Soude hi v versmaden voert Dan moesti te sinen dienste horen Daer ghi vrij wert te voren ¶Een wijsman seyt men vonde cume [1650] Enen mensche in alt gherume Die heymelijcheyt wel hale Hoe nauwe ment hem beuale ¶Petrus alpontius seyt Wanneer ghi uwe heymelijchey t [1655] Die in uwes herten kerker es gheuaen Enen anderen voert doet verstaen So heeft hi v in dien stonden In sinen kerker ghebonden ¶Seneca spreect die wise man [1660] Of een hem seluen niet en can Te sprekene verbieden Hoe sal hijt enen anderen verbieden Wildi dan des gheroeken Dat ghi aen vriende wilt raet soeken [1665] So suldi te voren besien In wat manieren ende aen wien Soecti dan raet dies ghi behoeft Ane enen vrient ongheproeft Dat es sere ter auonturen [1670] Hoe hi dat sal beruren Soecti oec raet ane eneghen man Daer trouwe hebt vonden an Ende hem ontdect al uwen sin Daer leghet auonture oec in [1675] Wantmen dicke grote vrienscap Heeft sien keren in viantscap Ende dan mochte hi v beraden Vele pinen ende scaden
Hoemen aen anderen raet
soeken sal ende aen wien
.xxj.
Hem dien ghi raets wilt vraghen [1680] En suldi niet ghewaghen uwen raet noch uwen moet |
