Die wise paeus innocentius [1415] Scrijft in sine boeke aldus Hi twifelt meest die meest verstaet In twifel salmen soeken raet Die vele wilt connen ende luttel can Bedrieghet meest hem seluen dan [1420] Van dat ghi claerlijc niet en verstaet Des nemt metten wisen raet Ende den sot en ghelouet niet Daer ghi met valt in verdriet
Aen wien ende hoe men raet
soeken sal
.xvj.
DRierehande raet salmen soeken [1425] Also men leest inden boeken Yrst aen gode sijts gewes Die wijs ende almechtich es Ja met innegher herten Ende met oetmoedegher begherten [1430] Ende hi salt doen gheloues mi Op dat dine bede orberlijc si Den anderen raet sal die man Ane hem seluen soeken dan Met groter voersienecheyden [1435] Ende daer op langhe genoech beyden ¶Derdewerf salmen soeken raet Ane wise liede dat verstaet Ende wijsselijc merken inden moet Weder die raet si arch of goet [1440] Maer emmer dat ghi niet en gewaget Den ghenen dien ghi raets vraget Wat v seluen goet dochte Want lichte dat hi mochte V volghen om dat hi [1445] V lieue woude doen daer bi ¶Dat wi ane gode hoe dat gaet Emmer selen soeken raet Dat bescrijft sinte iacob wel Int beghin van sijnre epistel [1450] Die der wijshey t willen roeken Salse aen gode yrstwerf soeken Diese mildelijc gheuen can So waer dat doget leget an Ende altoes gode danken mede [1455] Paulus seget in ene stede Al dat ons in dit leuen Van bouen wert thetheuen Vanden ewighen vader |
|
Dat es volmaect algader [1460] ¶Dit seyt ihesus sydrac Die menech wijs woert sprac Hi sprac die scalke rade vinden Dat si op hem seluen winden Ja alsijs alder minst moeden [1465] Ghemene rechte ons beuroeden Dat wi bidden en selen niet Wat onrecht es wats gesciet Want daer om wet wel dat Valt die mensche in gods hat [1470] Want hijs hem belghet herde zere Want hi es der werelt here Na dien dat smenschen raet Sonder gods hulpe onuast staet Ende wi sonder sijn ghehinc [1475] En moghen doen ghene dinc So selen wi yrst sonder letten Onsen raet aen gode setten Ende ane sine gherechtichede Ende hi sal ons daer mede [1480] Al goet werpen toe Wi en selen weten hoe Want hi spreect als men daer siet Sonder mi en moghedi doen niet
Watmen scuwen ende vlien sal
in rade
.xvij.
UIer dingen wilt des ghetruwen [1485] Sal elc mensche in rade scuwen Gramscap ende ghierechede Dronckenscap ende haestichede Dese .iiij. vroech ende spade Salmen scuwen in rade [1490] Ghine sult in gheenre tijt Raet soeken als ghi erre sijt Noch aen hem die erre es Bi vele redenen sijts ghewes Die erre es hi waent dan [1495] Meer vermoghen dan hi can So dat sijn wanen ende sijn achten Verre gaet bouen sine machten So bedrieghet hi hem daer ¶Die andere redene wet voer waer [1500] So wat die erre mensche seyt Keert al in onbeschedenheyt Ende daer met verwect hi mede Andere liede te gramhede |
