| Onthouden moghet ghenoech [1225] Ghi sult vraghen altoes met Dinghen die ghi niet en wet Den ghenen die de waerhey t weten Ende dat onthouden sonder vergheten Van uwer const en suldi niet [1230] V seluen prisen wats ghesciet Want prijs ende lof in eyghenen mont Wert onsuuer talre stont Die hem seluen vroet segghen Salmen metten sotten legghen [1235] Die een meester wille wesen Hoede hem wel van desen Dat hi hebbe spade ende vroe Dat enen meester behoert toe ¶Hets sulc clerc die besochte [1240] Die tenen meester niet en dochte Sulc goeden monc men oec vint Die tenen abdt en dochte twint Een meester sal sijn ghetam Bescheden ende oec eersam [1245] Ende wel sijn ghefondeert In die dinc die hi voert leert Eerlijc van allen saken Ende van eenre scoenre spraken Men sal oec studeren met staden [1250] Ende den sin niet te zere verladen Wat men sonder mate doet Dat valt gherne onder voet Maer datmen met maten past Dat duret gherne want hets vast [1255] Want oefeninghe wet dat al bloet Die met erenste duret te groet Doet sin ende nature faylgeren Ende sonderlinghe in studeren Want ons een wijs man seyt [1260] Dat in midden leghet die salichey t Oec een ander meester seghet Dat die cracht in midden leget Dat derde poente dat ghijt wet Daer men den sin mach rusten met [1265] Ende te poente setten weder Men sal den boeke legghen neder Ende yet anders gaen werken Daer die sinne bi ghesterken Of yewerinc gaen spacieren [1270] Daer die sinne bi glorieren Noch sijn .ij. andere saken Die den meester connen maken |
|
Deen es const ende dander wijsheyt Die dese .ij. niet en weyt [1275] Hine mochte nemmermeer sijn Van sijnre consten meester fijn Eest dan dat ghi v leren Ter clergyen wert wilt kere So suldi met .iiij. saken [1280] Uwen sin goet maken Ende scerpe te sulken dinghen Deen es met erenstigher meyninghen Dander es sonder waen Erenstelijc lesen ende dat verstaen [1285] Dat derde es datment al Int herte wel vesten sal Dat vierde es siet die lesse Datmen die ghedenckenesse Int herte dicke sal ouerslaen [1290] Sone maecht uter herten niet gaen Drierehande oetmoedecheyt Sal hi hebben die ter studien gheyt ¶Dierste es hoe dat vaert Dat hi ghene scientie onwaert [1295] Noch screfture hebben en sal Want die scrifturen sijn al Ghemaect tote onser lere Seneca seghet die here Dune souds niemans onwijshey t [1300] Versmaden noch hebben leyt Want aen beyde machmen leren Diet te rechte wilt bekeren Arch te connen hoert toe den vroeden Om dat sire ieghen hebben hoede [1305] Selen ende altoes vlien Ende ter doghet altoes tien ¶Dander es dat die scolere Hem niet en scame van wien hi lere Weder hi sot si ofte vroet [1310] Want seneca ons verstaen doet Hets beter cleyne dinc studeren Dan te wesene sonder leren ¶Die derde wijshey t des sijt vroet Als hi worden es clerc goet [1315] Dat hi dan vroech noch spade Andere clerke niet en versmade Want seneca spreect dit woert Dat ghi cont leret voert Oetmoedelijc dat radic nv [1320] Den ghenen dies begheert van v ¶Seneca seghet die wise man |
