Dat die wiue met quaden rade Die mannen honen vroech ende spade Ende anders in ghenen sinnen [575] En moghen si den man verwinnen Want dwijf heeft ghenoechte derin Dat si verscalct des mans sin
Hoe prudentia weder proeft met
v. redene dat die man werken sal
bi sijns wijfs rade
.vj.
Doen prudentia hadde gehoert Ende verstaen hadde alle die woert [580] Die gesproken hadde haer man Bat si hem orlof dan Tantwordene op dese dinc Hi dede daer toe al sijn ghehinc Ende seyde dat hem lief waer [585] Aldus sprac si daer naer Op dierste redene die ghi spraect Datmen v sot ende ongheraect Heten soude waert dat ghi V gheloefte wandelet mids mi [590] So antwordic dat niet en ware quaet Dat ghi wandelet uwen raet In dien dat ghi die dinghen Redelijc niet en mocht volbringen Wet datmen ghescreuen siet [595] Dat die vroede en lieghet niet Die sine gheloefte niet en leste Maer verwandelt om dat beste ¶Die paeus also men ons leert Heeft sinen raet om ghekeert [600] Om beters wille dats waer Also men leest in de cretale recte: decretale aldaer Oec wet dat die boeke spreken ¶Datmen quade gheloeften sal breken Ja dade men goede gheloefte [605] Men mochts wel comen of Opdat ieghen redene waer Ende der gherechticheyt contrare Die keyser oec dat ghijt wet Heeft voermaels statuten gheset [610] Ende als hi inder waerheyt verstoet Dat si niet orberlijc en ware no goet Hadde hi lieuer dat hi die dinc Brake dan sijn nacomelinc Het es scande den wisen man [615] Dat hi mesdoet maer nochtan |
|
Eest meer scanden also men vint Dat hi sijn dolen niet en kint Want dan es hi al uten kere Ende alte male sonder ere [620] Wet dat es grote wijsheyt Alse een man heeft messeyt Dat hi weder segghe dat Als hire toe heeft tijt ende stat Ic hore v daer nv spreken [625] Dat ghi den raet niet en woudt breken Dien ghi met so vele lieden sijt Ouer een ghedraghen te deser tijt Een luttel wise dat verstaet Moghen gheuen beteren raet [630] Dan vele dwase die roepen zere Ende luttel achten op v ere Haeste heeft meneghen man onteert Daer bi radic v dat ghi keert Ende aengaet die dinc met staden [635] Hi es wijs die hem laet gheraden ¶Op dander redene dat verstaet Dat ghi segt die wiue sijn quaet Ende datmen ghene en vindet goet Behouden uwen goeden moet [640] So antworde ic lieue here Dat ghi messegt alte zere Want ghi die versmaedt al En es niewerinc liefghetal ¶Seneca die meester seyt [645] Men sal versmaden niemans dwaeshey t Ende die wijsheyt altoes begheren Die onthouden ende voert leren Dat ghi cont ende hebt ghehoert Suldi lieflijc leren voert [650] Het hebben vele goeder wiue gheweest Also men in die scrifture leest Cristus waert van eenre gheboren Die reyne maghet was wtuercoren Daer hi ane in ware dinc [655] Menschelike nature ontfinc Dat seker niet en waer ghesciet Hadde hi daer arch in vonden iet Men heeft oec te vele stonden Menech heylich wijf vonden [660] Want doen verresen was onse here Woude hi hem vertoghen ere Enen wiue dan enen man Want hi vertoghede hem dan Marien magdalenen voer dien |
