[480] ¶Die wise man dachte in desen Om een woert dat hi hadde gelesen Dats dat nieman spreken en soude Daer men niet horen en woude Te vergheefs en salmen oec niet [485] Wijsheyt spreken wats ghesciet Dine redene peynsde hi es verloren Want men wilter hier niet horen Dits recht dier ghelike Oftmen songhe suete musike [490] Voer die ghene die lude screyen Also es dit buten viseyen Doen sprac noch die oude man Die raeds niet verbeyden can Die hoert ter rechter sotheyt [495] Want die sot heeft raet gherne leyt Mettien liet hi sijn spreken staen Ende es neder gheseten saen Doen ghincmen ghinder tracteren Hoe men ten orloghe soude keren [500] Ende vromelike vaen ter wraken Mellibeus was wel ter saken Datmen dus ghereden ghinc Ende confirmeerde alle die dinc
Hoe mellibeus proeft met .v.
redenen dat die man niet en
sal werken met sijns wijfs rade
.v.
Doen die goede vrouwe sach an [505] Die willechey t van haren man Ende dat dese dinghen sonder wanc Emmer hebben voert ganc Es si te haren man ghegaen Ende heeft hem aldus doen verstaen [510] Here sprac si ic bidde v Dat ghi mi gheeft een bede nv Dat es dat ghi v met staden Op dese dinc wilt beraden Ende legt v haesticheyt neder [515] Ende comt tot v seluen weder Ende en gheloeft hen niet here Die daer roepen also sere Waer om so en soudi Des niet ghelouen mi [520] V scade es mine scade Daer om doet dat ic v rade ¶Mellibeus die goede man |
|
Antworde der vrouwen dan Met uwen rade wats ghesciet [525] Sone willic werken niet Mids vele redenen dat verstaet Want dadic nv uwen raet Ende liete den raet te nieute varen Daer so vele liede ouer waren [530] So soude men met mi maken spot Ende segghen ic waer een sot ¶Dander redene dat verstaet Es dat die wiue sijn so quaet Datmen en ghene goede en vint [535] Also ons salomon doet bekint Hi seyt daer die wise man Die grote wijsheyt scriuen can Van dusent mannen in minen stonden So hebbic cume enen vonden [540] Ende van wiuen int ghemene En constic niet gheuinden ene ¶Die derde redene wilt mi verstaen Waric uwen rade onderdaen So soudt schinen dat ghi [545] macht dan hadt bouen mi Ende dan soudi na desen Mi contrarie willen wesen Alse ghi hadt die ouer hant Als ihesus sydrac doet becant [550] Eest dat douerhant heeft dat wijf So es haer man dan een keytijf Oec seghet salomon du en soudt Kindere no wiue ghene ghewout Brueder no vrienden bouen di [555] Het es vele beter dat si Di vervloeken vroech ende spade Dan du stondes te hare ghenaden Want salichliker es gheuen Dan nemen vint men bescreuen [560] ¶Die vierde redene machmen merken Soudic bi uwen rade werken So moesti wien lief of leyt Weten alle mine heymelijcheyt Die niet en mochte sijn openbaer [565] Voer die stonde dat tijt waer Dat en mochstu ghehelen niet Want men daer ghescreuen siet Dat wijf dat helen can allene Dat si en wete groet no clene [570] ¶Die vijfste redene nv hoert Arestotiles seghet dit woert |
