| En es oetmoets ghelike Mine goedertierenhey t heeft v Daer toe bracht ende ghedwonghen nv Dat ghi hebt ghekeert daer bi [3785] Vwen grammen moet van mi Vwen moet heeft mi ghedreuen Daer toe dat ic v wille vergheuen Aldus can mi in waren dinghen Oetmoet vele goets in bringhen [3790] ¶Salomon seghet soete spraken Connen vele vriende maken Ende harde tale die can Ter gramscap wecken den man Ende saechte antworde weder [3795] Can gramscap legghen neder Noch es daer een auctoriteyt Niet wel en wetic wie dat seyt Dbeghin van vrienscapen es Wel spreken sijts ghewes [3800] Ende quaet spreken heeft in Van viantscapen dat beghin Want ic uwen groten rouwe Wel merke ende aenscouwe So willict v vergheuen al [3805] Om dat mi god vergheuen sal Want uwen groten rouwe in desen Sal uwe penitentie wesen Ende uwe grote oetmoedecheyt Verwect mi ter ghenadecheyt [3810] So dat ic v al sonder waen Vergheue dat ghi mi hebt mesdaen Ende hebt ontfaen mine gracie te hant Doen hief hise op metter hant Ende cussese aen haren mont [3815] Ende sprac aldus ter seluer stont Gaet met payse met onsen heer Ende en mesdoet niet meer Aldus schieden si doe In beyden siden blide ende vroe [3820] ¶Dit boec waert met mire pinen Ghetracteert vten latine Al tandwerpen in die poert Int iaer na gods gheboert XiijC.xl. ende twee [3825] Te half aprille min no mee Daer menech scoen auctoriteyt Troest raet wijsheyt in leyt Diet dicwile lesen ende onthouden Haer worde selen menechfouden |
|
[3830] Ende si selen oec sonder blijfTe bat varen aen ziele aen lijf Gheloeft si god van hemelrike Nu segt amen ghemeynlike. Amen etcetera |
