Die wijs wilt sijn van sinne Moet ghestadech sijn daerinne Onueruaert ende niet bedroeft Dats datter wijsheyt wel behoeft [945] Metten wisen gherne gaen Ende haer leringhe wel verstaen Ende van allen ghewaghen Ende van datmen twifelt vragen Eest van ionghen eest van ouden [950] Ende dat vromelijc onthouden Also wel van quaden als van goeden Ende van sotten als van vroeden Op dat daer wijsheyt in leghet Dit es dat die wise man seghet [955] Ghi sult altoes begheren Die alder beste lereren Phisicine ende surgine Als ghi wilt bi v te sine Den besten meester die men vint [960] Elc van dies hi hem onderwint Suldi nemen tuwen rade Van elker const vroech ende spade So welken tijt dat ghijs Behoeft in enegher wijs [965] ¶Een vroet man maect ons gewes Dat een wijs meester beter es Diere ghehuert diet wel besiet Dan een sot meester om niet Ende een lelijc wijs beter dan [970] Dan een scoen ionc sot man Hi doelt zere dat ghijt wet Die dat scone voer dat goede set Ende wet oec dat si dicwile sneuen Die doude om dat nuwe gheuen [975] Dit es van allen consten geseget Die men nv ter werelt pleghet
Wat dinghen dat noedorftich sijn
den studenten
.xj.
Die studeren wilt ende leren Selen haren sin met allen keren Toter dinc lude ende stille [980] Daer hi in studeren wille Met groter ernste gheloues mi Ja een dinc die orberlijc si Ende die den man moghen bringen Tot goede ende tot hogen dinghen [985] Men salt yrst leren datmen hoert |
|
Ende dat namaels leren voert Nieman en sal hebbic ghelesen Te vroech meester willen wesen Maer men moet pinen menegen dach [990] Eer men ten hoechsten comen mach Ende oec ter eeren van ertrike En machmen niet comen haestelike Men moet den tijt langhe liden In sorghen ende in arbeyden [995] Men sal yrst dat cleyne leren Ende dan toten meerren keren Het es beter alsic versta Datmen neder opt cleyne ga Dan of men bouen opt hoghe liep [1000] Ende dan neder viele int diepe ¶Een ionghere die wille leren Sal sinen meester eren Ende hem sijn onderdaen Ende met hem oec gherne gaen [1005] Want hijt hem gherne sage ontfaen Ende met onderscede doen verstaen Alse die meester heeft voren Jonghers die ernstelijc horen So glorieert hi in dat [1010] Ende leset hen vele te bat Nieman en vtet gherne sijn woert Daer mense niet gherne en hoert Die ionghere en mach als wi lesen Niet bouen sinen meester wesen [1015] Ende dat hi in die scole hoert Sal hi thuys vertrecken voert Ende dicwile in sijn herte verslaen Sone maecht hem niet ontgaen Men moet pinen ende arbeyden [1020] Ende met ernste daer in verbeyden Want roekeloesheyt voer waer Es een stiefmoeder harde swaer Ende ernstichey t alsic beuroede Es moeder van allen goede [1025] Met arbeyden mach men comen Tot groter eren ende te vromen Ende alle onsalichede Can volghen der ledechede Die studeren wilt dat hi siet [1030] En sal haestelijc liden niet Maer met goeden staden sal hi Die scrifture gronden wat si si Ende na die waerheyt dat verstaen Die scrifture heeft beuaen |
