| Es alte goet of alte quaet Men leest daer alsic versta [760] Dat vrouwe rebecca Ysacke riet haren man Dat hi die benedixie gaf dan Jacob sinen sone Daer hi bi waert scone [765] Bouen sine brueders scone ende here Ende oec quam tot sulker ere Dat hi waert al tenen gader Van xij. gheslachten vader Daer die gods sone vercoren [770] Wt woude sijn gheboren Judith oec die wise vrouwe Verloeste alsic bescreuen scouwe Die stat daer si woende binnen Die olyfernus woude winnen [775] Ende destruerense sonder ghenade Dit dede si met wisen rade Abygail in deser wijs Verloeste oec met rade wijs Nabale haren man [780] Dien coninc dauid op ran Om dat hine woude verslaen Sijn vrouwe heeftene sonder waen Verloest met goeden rade Die ioden van groten stade [785] Ende verhiefse hoechlike In coninc asurrus rike Deser exemplen soude men v Sonder inde tellen nv Dat wiue in haren leuen [790] Goeden raet hebben ghegheuen ¶Dander redene waer bi Wijfs raet te horene si Ende oec te doene op dat hi Orberlijc es ende vrij [795] Machmen merken daer an Doen onse here den yrsten man Hadde ghemaect sprac hi ten saken Laet ons hem een hulpe maken Hem en behoert niet allene te sine [800] Doen nam hi al sonder pine Een rebbe wt adams lijf Ende maecte daer af een wijf Om dat si hem in daden Ende in rade soude staen in staden [805] Ende wet dat sonder waen Dat ertrike niet en mochte staen |
|
Noch in goeden poente bliuen Sonder raet ende hulpe van wiuen Want onse here seget selue daer [810] In dewangelie openbaer Dat die sal beyde gader Laten moeder ende vader Ende met sinen wiue gaen Ende beyde in enen vleesche staen [815] Ende na dien dat wijf ende man Een vleesch sijn so en sal dan Dwijf niet versmaedt wesen Want wi in die scrifture lesen Dijns selfs vleesch wats gesciet [820] En soutu versmaden niet ¶Die derde redene es dese Ghelijc dat ic daer lese In een vers openbaer Dats ghesproken ouer menech jaer [825] Dat wijf es beter menechfout Dan ghesteynte ziluer of gout Als of hi ons woude maken vroet Dat gheen dinc en es so goet Alse dwijf op ertrike [830] Want men niet en vint dies gelike ¶Die vierde redene alsic versta Bescrijft oec seneca Die bouen al dat leeft Goeden vrouwen prijs gheeft [835] Hi seghet dat gheen dinc en gheyt Bouen wijfs goedertierenheyt En es niet so wreet no so stijf Als een quaet onrastelijc wijf Also ghelijc als goede vrouwen [840] Haer lijf setten met trouwen Voer haers mans salichede Also settet quaet wijf mede Haer lijf met ernste groet Om toe te bringhen haers mans doet [845] ¶Die vijfste redene bringt ons toe Die wise cathoen seghet also Al es dijns wijfs tonghe wreet Op dat daer wijsheyt wt gheet Dat soutu lieflike verdraghen [850] Men hoert seneca ghewaghen Die in wijsheden niet en was slap Dat des goeds wijfs gheselscap Bouen alle gheselscap gaet Si houdt des mans huysraet [855] Ende draghet sorghe ende hoede |
