Folio 2r

  Index | << Previous page | Next page >>  

Also bescreef hi selue dat Oec bescrijft hi wet voer waer [110] Dat hi dit boec maecte int iaer Xijc dat ghi dat wet Ende xlvj daer toe met So wie dat dit boec ghewint Ende leeft ende wel versint [115] Moets emmer te beter wesen Opdat hijt dicke wilt ouerlesen Want die auctoriteyte rueren Vter heyligher scrifturen Vten loye decretale [120] Ende uten lereren also wale Also dat latijn houdt in Nu hoert hier dat beghin

Van mellibeus onuerduldecheyt
Ende van vrouwe prudentien
troeste


Dit boec beghint aldus Een man was hiet melli [125] beus Die mechtich Jonc ende rijc was Op enen tijt luste hem das Dat hi van huys woude tiden Ende hem verwandelen riden [130] Opten velde verre buten Sine woninge dede hi toe sluten Allomme ende omme harde wale Ende liet daer in ten seluen male Sijn wijf die hiet prudentia [135] Ende sijn dochter alsic versta Die hi minde harde zere Doen dus henen was die here Quamen .iij. sijnre vianden Die met lederen al te handen [140] Ten vinsteren clommen in Ende spaerden meer no min Maer sloegen die vrouwe iammerlijc Ende sijnre dochter dies ghelijc Gauen si meneghe wonde [145] Ende lietense daer ter stonde Ligghen ofte si doet waer Ende scieden also van hare Doen mellibeus thuys quam Ende dese grote mort vernam [150] Maecte hi alte groet mesbaer Hi scoerde sijn cledere hi trac sijn haer
 
  Hi suchte hi weende hi creet Sine hande hi te gader smeet Ende maecte alsulc mesbaer [155] Ofte hi wt sinen sinne waer Doen die wise vrouwe sach an Dat onghedout van haren man Bat si hem met soeticheden Dat hi hem sette te vreden [160] Ende hem seluen en versloeghe niet So dit die vrouwe meer riet So haer man meer mesliet Ende meer vernude sijn verdriet Doen beyde die vrouwe een deel bat [165] Tote haer man ghecist was nadat Sprac si hem dus ane doe O dwaes man ende waer toe Meslati v dus zere Ieghen spoet ende ieghen ere [170] Tempert v mesbare nv Met wijsheden dat radic v Den vroeden en bedarf niet Dat hi swaerlike droeue yet Want droefheyt en can bringhen in [175] Salecheyt noch oec ghewin V dochter sal van desen Of god wilt wel ghenesen Ende ic achte dat si doet si Nochtan en suldi daer bi [180] V seluen niet al verslaen Seneca doet ons verstaen Die vroede en verslaet hem cleen no groet Om kindere noch om vriende doet Metten seluen mach hi verdraghen [185] Die doet van kindere ende van maghen Dat hi sijns selfs doet verbeyden moet Ic hebbe lieuer des sijt vroet Dat ghi den rouwe begheuet nv Dan die rouwe begaue v [190] Ende al woudijt langhe hanteren Ghine mochtes niet harderen Mellibeus antworde te hant Wie es alsulc in allet lant Die soude in dus danen doghen [195] Sijn wenen begheuen moghen Want onse here ihesus christus Om sinen goeden vrient lazarus Hadde inden gheest droefhede Ende traende metten oghen mede [200] Der bi en eest mi scande en ghene