Van sinen liue van sinen goede Waer haer man rijdt of gaet Altoes es si sere vernaert Om sijn lijf ende om sijn ere [860] Ende sorghet om hem harde zere Here Mellibeus daer bi Wilt horen ende werken na mi Ic sal wilt god in corter stont V dochter leueren al ghesont [865] Ende dit doen al termineren Tot uwer baten ende tot uwer eren
Mellibeus antworde pruden-
tien
viij
Mellibeus heeft ghehoert Ende verstaen sijns wijfs woert So dat hem therte verblide ende verlichte [870] Met enen bliden aensichte Antworde hi dus der vrouwen saen Die woerde die wt uwen monde gaen Sijn soeter dan enech honich es Ende connen gheuen des sijt ghewes [875] Ghesonde der zielen ende den liue Al comen si wt ene wiue Om die wise ende soete woert Die ic van v nv hebbe ghehoert Ende ghemerct te deser tijt [880] Beuroedic wel dat ghi sijt Wijs ghetrouwe ende bescheyden Daer om so willic leyden Alle mijn saken met uwen rade Ende daer bi werken vroech ende spade [885] ¶Die vrouwe antworde doe Wildi wijsselijc leuen so Behoert v toe dat ghi Wijsselijc werct daer bi Want sonder voersieneghen raet [890] Doetmen dicke dat es quaet ¶Mellibeus antworde nv Segt mi vrouwe des biddic v Beschedelijc wat wijsheyt si Ende welkerhande si es daer bi [895] Ende hoe men die beiaghen sal Ende oec hanteren ouer al
Van wijsheyden
.ix.
|
|
Wijsheyt can sien des sijt vroet Dondersceet tusschen quaet ende goet Ende datmen ter doghet sal tien [900] Ende dat quade altoes vlien Also cassidorusseyt Gaet bouen alle dinc wijsheyt Wijsheyt maect allomme ommare Datter doghet es contrare [905] Ende si can alle dinc voersien Die namaels mach gheschien Wijsheyt scuwet houerde Sine wilt oec in haer gheuerde Ouerdaet noch vrecheyt [910] Si soeket bescedene miltheyt ¶Wijsheyt set hoede nacht ende dach Jeghen aldat haer deren mach Ende altoes soect si ere Ende scande vliet si zere [915] Die gherecht wijs es Die es salich sijts ghewes Ende wijsheyt maect allene Goet leuen ende rene Wijsheyt breect vele sorghen [920] Wijsheyt es niet verborghen Wijsheyt doet den mensche verstaen Hoe hemel ende erde sijn ghedaen Wijsheyt van astronomien Ende daer toe alle die clergien [925] Wijsheyt can hoede maken Jeghen alle arghe saken Want si can verre voersien Dinghen die moghen ghescien Wijsheyt can den mensche leyden [930] Ter eweliker salicheyden Wie meer staet na dertsche goet Of na deser werelt spoet Dan na die hulde van sinen god Hine es niet wijs maer hi es sot [935] Hi slacht hem die verrot hout Kiest voer ghefineert gout Want hi titelijc goet verkiest Daer hi dewelijc om verliest Die wijsheyt heeft inden sin [940] Heeft alle doghet daer in
Hoe men wijsheyt ghewin-
nen sal
.x.
|
